من طرف احنا, بثورة, هو, قولنا
هو إحنا قومنا بثورة
واللا إحنا كنا بنحلم
مش فاهم أى حاجة
ونفسى يا ناس أفهم
******
يعنى إية اللى يسرق فرخة
يتحاكم ف ساعة ويوم
واللى سرق البلد بحالها
ف مستشفى خمس نجوم
هو أنتوا صحيح معانا
ومش بتخونوا الأمانة
واللا أنا د ماغى خربانة
وجاهل ومش بأفهم
هو إحنا قومنا بثورة
واللا كنا بنحلم
مش فاهم أى حاجة
ونفسى يا ناس افهم
******
اللى أمر بضرب النار
وفتح السجون للبلطجية
مش سر من الاسرار
ولاعا يزة مفهومية
رئيس كل حاجة
هو يشيل القضية
ومن وراة ولادة
والعادلى وكل الحرامية
امين الشرطة السنى
هارب واخد إعدام
وعلى بابا والعصابة
لسة بخير وسلام
ودكاترة من المانيا
وعيشة تمام التمام
هو دة حق الشهدا
والله العظيم حرام
******
هو انتوا صحيح معانا
ومش بتخونوا الامانة
واللا انا دماغى خربانة
جاهل ومش بأفهم
هو إحنا قومنا بثورة
واللا احنا كنا بنحلم
مش فاهم أى حاجة
ونفسى يا ناس أفهم
******